Аллоҳ номи ила бошлайман сўзим,
Сийрат лавҳасидан ёшланди кўзим,
Ўзгалар тавсифи бизга не керак?!
У Зотнинг сийрати бизларга ўрнак!
Вақтларнинг тожидир асри саодат,
Уммат яшар умид қилиб шафоат,
Ҳавзи кавсарига талпинар юрак,
У Зотнинг сийрати бизларга ўрнак!
У Зотнинг таърифига ожиздир қалам,
Йўқотган кунига йиғлайди олам.
Ҳадислар татбиқи энг олий тилак,
У Зотнинг сийрати бизларга ўрнак!
Набийнинг сўзлари меросдир бизга,
Амал қилмоқ вожибдир барчамизга.
Ҳадис ўрганишга шимаринг билак,
У Зотнинг сийрати бизларга ўрнак!
Сийратин ўрганинг ҳар кун, ҳар замон,
У Зотга муҳаббат саналур иймон.
Ўрганиш восита, татбиқи мақсад.
У Зотнинг сийрати бизларга ўрнак!
Расулга муносиб уммат бўлайлик,
Исломнинг хизматин ҳар кун қилайлик.
Бизга не иш қолди булардан бўлак?!
У Зотнинг сийрати бизларга ўрнак!
Шу ерда байтларин тамомлаб Ийсо,
Не бўлар мавзуга қилса интиҳо?
Сўзлари соғинчдан беради дарак,
У Зотнинг сийрати бизларга ўрнак!
Ийсохон Яҳё
