Сабр таги – сариқ олтин

Sabr tagi – sariq oltin

Dono xalqimizda “Sabr tagi – sariq oltin” degan aqlli naql bor. Maqolda sabr-bardosh ortidan kelajak xayrli natijalarni qimmatbaho toshga o`xshatilganidan, uni dunyoviy maqsad sari intilishda qat`iyatli bo`lishga targ`ib ma`nosida deb tushunish mumkin. Darhaqiqat, ko`pchilik shu ma`noni tushunadi ham. Va ko`zlagan maqsadlari sari harakatlarida shu maqolni o`zlariga bosh printcip qilib, iloji boricha qanoat bilan oldinga intilib katta-katta yutuqlarga erishadilar. Albatta, bu yaxshi odat.

Biroq, Islom nuqtai nazaridan boqilsa, “Sabr tagi – sariq oltin”  tushunchasi  bizning tasavvurimizdagiga nisbatan ancha kengroqligi, sabrga berilajak ajrlar esa sariq oltin tugul oq olmoslardan ham qimmatbahoroq ekanini, sabrning “sariq oltin”lari nafaqat bu foniy dunyo bilan chegaralangan, balki boqiy dunyoda ham asqotishini anglash mumkin.

Inson hayotda yashar ekan kutilgan va kutilmagan musibatlarga duchor bo`lishi tabiiydir. Gohida sog`ligini yo`qotsa, ba`zida yaqinlarida judo bo`ladi. Egallagan mansabidan ajralishi ham ehtimoldan holi emas. Yana ba`zida har-xil xavf-xatarlar girdobiga tushib qoladi. Nima bo`lganda ham boshiga musibat tushgan mo`min o`zini yo`qotib qo`ymasligi, bu kulfatlarni Yaratganning sinovi o`laroq qabul etib, unga chidamli bo`lishi lozim. To`g`ri kelgan odamga musibatini arz qilib holidan shikoyat qilish, Alloh taoloning g`azabini keltiradigan noma`qul so`zlarni aytib betoqat bo`lish mo`minga yarashmasligini bilishi zarur. Ahli musibatlar ruhiy tushkunlikka tushish o`rniga aksincha, musibatni ulkan imkoniyat eshigi deb bilishi va undan unumli foydalanib qolishlari kerak bo`ladi.

Alloh taolo bandalarini turli-tuman balolar bilan imtihon qilib turishi, imtihonni “a`lo baho”ga topshirganlarga behisob ajrlar va`dasi qur`oniy haqiqatdir. Baqara surasida shunday marhamat etilgan: “Albata, Biz sizlarni bir oz qo`rqinch va ochlik bilan, mol-mulkga, jonga mevalarga nuqson yetkazish bilan sinaymiz. Va sabrlilarga xushxabar bering” (Baqara/155). Zumar surasida esa quyidagicha va`da bor: “Albatta, sabr qilguvchilarga ajrlari hisobsiz, to`liq berilur” (Zumar/10).

Ha, sabrning mukofoti behisob va benihoyadir! Unig miqdori faqat Haq taoloning O`ziga ayondir!

Bilasizmi, musibat agar unga sabr etilsa gunohlarni yuvib tozalab tashlovchi kafforat bo`ladi. E`tibor bering, hazrati Abu Hurayra va Abu Sa`iyd (roziyallohu anhuma) ikkovlari aytadilar: biz Rasulullohdan (sollallohu alayhi va sallam) eshitganmiz, Ul zot shunday deganlar: “Mo`minga yetgan har bir hastalik, xorg`inlik, og`riq, maxzunlik va hatto ham-tashvish ham uning gunohlariga kafforat bo`ladi” (Sahihihi Muslim 4/1993).

Ulug` sahobalardan Jobir Ibn Abdulloh (roziyallohu anhu) aytadi: Rasululloh (sollallohu alayhi va sallam) Ummu Soibni ko`rgani borganda unga:

— “Senga nima bo`ldi ey Ummu Soib, tez-tez hansirab nafas chiqaryapsan?”—dedilar.

— U: “Bezgak. Alloh barakasini olsin buni”—dedi.

— Rasululloh: “Bezgakni so`kmagin, chunki Alloh taolo u bilan odam bolasining xatolarini xuddi bosqon temir zanggini ketkazgani singari ketkazadi”—dedilar (Sunani Abu Dovud 3/182).

Bilasizmi, musibatga sabr qilgan mo`minga hisobsiz savob va`da qilgan mehribon Robbimiz, gunohlarini o`chirish bilan birga musibat chog`ida uzrli qoldirilgan xayrli amallarni amal daftarlarga bajarildi deb qaydlatar ekan. E`tibor bering, Abu Muso al-Ash`ariy (roziyallohu anhu) aytadi: Rasulullohdan (sollallohu alayhi va sallam) ko`p marta eshitganman, Ul zot aytardilar: “Mo`min solih amallarga odatlangan bo`lsa-yu, biroq hastalik yo musofirlik uni odatiy amallaridan mashg`ul qilib qo`ysa, unga sog`lik va muqimlik chog`ida qilib kelgan amallari yozilib borilaveradi” (Sunani Abu Dovud 3/182).

Shunday ekan, azizlar! Boshimizga har ne musibat tushganda ham alamzadalik qilib Allohga xush kelmas ishlardan xazir bo`laylik. Balki, musibatni bandasiga arz qilmasdan uning ajrini Xoliq taolodan kutaylik! Alloh taolo barchamizni shariat doirasida sobitqadam qilsin!

Andijon tumani “Dovudxon to`ra” jome masjid imom-xatibi

Madrahimov Abdulvahhob qori