Ҳизбчи йигитлар ва “салафий”лар етакчисининг ўзаро баҳси юзасидан холисона ТАҲЛИЛ

Hizbchi yigitlar va “salafiy”lar yetakchisining o`zaro bahsi yuzasidan xolisona TAHLIL

Texnika taraqqiy etib, juda ko`pchilik hayotining bir qismiga aylangan internet olamida, yaqin kunlarda ikki ekstremistik oqim hizbiylik va salafiylik a`zolari orasida sodir bo`lgan bahs keng tarqaldi. O`ziga ABDULLOH deb tahallus qo`ygan hizbut-tahrir a`zosi ijtimoiy tarmoqlarda “Sodiqjon domlaga holis nasihat!” nomli nasihatnomasini baralla e`lon qildi. U bu maktubni oxirgi ikki yil ichida virtual olamda “Shayx Sodiq Samarqandiy” nomi bilan shuhrat topgan bemazhab “salafiy”lik targ`ibotchisiga raddiya sifatida yo`llagan.

Hizbchi Abdullohning yozishicha, 2015 yilning 23 oktyabrida salafizm targ`ibotiga yo`naltirilgan sayt — Ixlos.org veb sahifasida Hizb ut-Tahrir sha`niga to`g`ri kelmaydigan maqola chop etilgan. Va o`sha maqolada hizbchining iddaosiga ko`ra, Hizb ut-Tahrir nashr qilgan kitoblardan keltirilgan iqtiboslar asl nusxaning umumiy ma`nosidan qirqib olinib, boshqa ma`noga burilgan va matnni tarjima qilishda ham katta xatolarga yo`l qo`yilgan ekan.

Buning ortidan hizbchilar Sodiq samarqandiyni o`zaro fikr almashish uchun uchrashuvga taklif qilishadi. Samarqandiyning ijobiy javobi ila uchrashuv amalga oshadi va unda butun dunyo musulmonlari boshidan kechirayotgan vaziyat haqida bahs yuritiladi. Suhbat davomida hizbchilar:

• “Agar siz Hizb ut-Tahrir haqida, u tanlagan yo`l, u nashr qilgan kitoblar yoki bu kitoblardagi qaysidir ra`y, fikr, ibora va kalimalar haqida batafsil ma`lumot olmoqchi bo`lsangiz, bizga xohlagan paytingizda murojaat qilishingiz mumkin. Biz sizga kitoblarimiz va ularda keltirilgan mavzularni batafsil yoritib berishga tayyormiz”, deb taklif qilishadi.

Sodiq samarqandiy bunga:

• “Juda to`g`ri gaplarni aytdingizlar, birodarlar! Sizlar toshning bir tomonini ko`tarayotgan bo`lsangizlar, biz ham bir tomonini ko`tarmoqdamiz. Hammamizning dardu g`amimiz shu ummatni birlashtirish. Biz ayrim domlalarimiz qilgan xatoni qilmaymiz. Falonchi domla o`z masjididan janoza namozini ado qilgani kelgan bir hizbiyni haydab chiqaribdi. Buni qanday tushunish mumkin?! Axir biz musulmon birodarlarimizni unisini undoq, bunisini esa bundoq deb tosh otaversak, bundan faqatgina kufr ahli va munofiqlar quvonadiku?!”, deb javob bergan.

Sodiq samarqandiyning bu mulohazalari hizbchilarni qoniqtirgan chog`i u haqda: “ongli, farosatli olimlarga hos gaplar qildi”, deb olqaydilar.

Shu yerda e`tiboringizni bir masalaga jalb qilamiz:

Agar o`sha  el orasida “shayx Sodiq samarqandiy” nomi bilan tanilgan shaxs sof Ahli sunna ta`limoti bo`yicha e`tiqod qilganda, hizbchilar bilan kelishmagan, ularni tasdiqlamagan, manhajimiz turlicha bo`lsada (ya`ni, sizlar hizbiy biz esa “salafiy” ma`nosida) birlamchi maqsadimiz – ummatni birlashtirish g`amida bir-birimiz bilan birlashar ekanmiz demagan, janozaga kelgan hizbiyni haydab chiqargan imom domlani tanqid qilmagan bo`lardi. Ha, agar o`sha Sodiq samarqandiy islomda yangi paydo bo`lgan narsalarning hukmini yaxshiroq bilganida, bid`atdan xazar qilish qay darajada ahamiyatli ekanini to`liq anglab yetganida, Rasululloh sollallohu alayhi va sallamning: “Dinda yangi chiqqan narsalardan saqlaning! Chunki dinga kiritilgan har bir yangilik bid`atdir, har bid`at zalolatdir, har bir zalolat do`zaxdadir”, degan hadislariga amal qilganda, shuningdek, Islom ummatining ahli bid`atlar bilan orani uzish, ularni hajr qilish, munosabatlarni uzishlik lozim ekaniga bir ovozdan ittifoq qilgan ijmo`sidan xabardor bo`lganida, hizbchilar tashabbusi bilan uyushtirilgan uchrashuvdan do`stona munosabat o`rnatib, birodarlik kayfiyatida chiqmagan bo`lardi.

Sodiq samarqandiyning bu qilig`i uning dinda tanlagan yo`li noto`g`ri ekanini ochiq-oydin isbotlab beradi. Chunki Islomda musulmonning maqsadi ham, maqsad sari olib boruvchi tanlagan manhaji va harakatlari ham aniq va shar`iy tartib intizom asosida bo`lishi ta`kidlanadi. Sodiq samarqandiyga o`xshab, to`g`ri kelgan yangi diniy toifalar bilan kelishib ketaverish, barimizning dardu g`amimiz bir – ummatni birlashtirish, sizlar toshni u tomonini biz esa bu tomonini ko`taramiz, hamkorlikda harakat qilaveramiz,  deyish aslida Islom nizomini buzishdir. Bu haqiqatni anglab yetish uchun oliy ma`lumot va o`tkir aql talab ham qilinmaydi aslida. Bu uchun ozroq aql va sog`lom tafakkurning o`zi yetarli.

Rasululloh sollallohu alayhi va sallam bu ummatning yetmish uch firqaga ajralib ketishini oldindan aytib qo`yganlar. Shuningdek, o`sha toifalarning deyarli hammasi jahannamiy ekanligi, faqat atigi bir donasigina ya`ni, Rasululloh sollallohu alayhi vasallam va sahobalar yo`lidan og`maganlargina jannatiy bo`lishini ham bashorat qilib qo`yganlar. Nazarimizda Sodiqjon domla shu haqiqatni anglashga ham ojiz ko`rinadi. Aks holda u hizbiylar bilan kelishmagan bo`lardi. Axir Rasululloh sollallohu alayhi va sallam jahannamiy deb sanagan o`sha yetmish ikki toifa a`zolarining bosh maqsadi ham, jannatiy deb bashorat qilingan yagona jamoaning maqsadi ham aslida bir-biridan farqli bo`lmagan. Ularning hammasi Allohning kalomini ulug`lash, ummatni bir din, bir mafkura ostida birlashtirish sari harakat qilishlarini ta`kidlaydigan toifalardir. Lekin ularni yetmish uchga bo`lib tashlagan narsa bu ularning o`sha maqsad sari borishda tanlagan manhaj -mazhablaridir, aqidaviy ixtiloflaridir. Sodiq samarqandiy bularni bilmaydi chog`i…

Agar bilganida edi, uning o`zi hizbiylar ila g`iybat qilgan imom singari ish tutardi, janozaga kelgan hizbiyni masjiddan quvgan imom singari u ham uni uchrashuvga taklif qilgan hizbiylarni quvib solar, yo ularning yo`li chirik g`oyalar asosiga barpo bo`lganini isbotlab, ularga tushuntirib bergan bo`lardi. Bularning o`rniga o`zini “shayx” deb mashhur qilishga harakat qilayotgan bu odam qayoqdagi bid`atchi, hattoki o`zaro aqidaviy birlikka ham ega bo`lmagan, tayinsiz, o`ta zaif toifa vakillari bilan maqsadimiz bir ekan deb apoq-chapoq bo`lib o`tiribdi.

Sodiq samarqandiyning bu ishi nimani anglatadi? Bu shuni anglatadiki, salafiylik ham xuddi hizbiylik singari negizi chirik toifadir, ularning tashqi qiyofasi boshqa-boshqa bo`lsada, asl negizi birdir, ya`ni bu ikki toifa xavorijlik aqidasida birlashishini anglatadi.

ABDULLOH tahallusli hizbchining yozishicha o`sha uchrashuvdan Sodiq samarqandiy ham hizbiy yigitlar ham, o`zaro samimiy munosabatda bo`lgan holda tarqalishgan ekan. Lekin voqeaning qiziqroq qismi keyin chiqqan. 2016 yil 22 oktyabr kuni Ixlos.org veb sahifasida «Hizb ut-Tahrir haqida» sarlavhasi bilan Sodiq samarqandiyning savol-javob videolavhasi chiqadi va ijtimoiy tarmoqlarda ham keng tarqatiladi. Videolavha mazmuni shunday: Sodiq samarqandiyga otasi hizbiy bo`lgan bir yigit quyidagicha savol qiladi:

“Shayx, mening otam hizb ut-Tahrir. Va u meni ham ham shu toifaga sadoqatli bo`lishga chaqiradi. Hattoki o`lmi oldidan ham menga shu oqimda to umrim oxirigacha sodiq qolishimni vasiyat qildi. Buning hukmi nima?”.

Sodiq samarqandiy esa quyidagi mazmunda javob beradi:

«Bu savolga javob berishdan oldin hizb ut-Tahrir jamoasini kimligini bilib olish maqsadga muvofiqdir. Hizb ut-Tahrir jamoasi ahli sunnadan emas. Bu toifa bir qancha fiqhiy va aqidaviy masalalarda, manhajda ahli sunnaga xilof qilishgan. Bularning ichida olim inson yo`q. Bular ilmdan yiroq toifa. Shuni o`zi ham ularning ochiq-mubin zalolatda ekanini ko`rsatadi. Nomahram ayollar bilan qo`l berib ko`rishish, hatto o`pishishni ham muboh sanashadi. Hatto toifa asoschisi Nabahoniyning aynan o`zini shu haqdagi fatvosini o`qidim men. Ularning eng katta xatolaridan biri “G`oya vasilani halol qiladi” degan qoidalaridir. Ya`ni, ko`zlangan maqsad yaxshi bo`lsa unga olib boradigan yo`lning qanday bo`lishini ahamiyati yo`q. Ayol kishining maqsadi yaxshi bo`lsa hijob kiymasa ham, parlament majlislarida erkaklarga aralashib o`tirsa ham bo`laveradi va hokazo gaplar. Xullas hizb ut-tahrirga ergashish mumkinmas, savol qilgan yigit otasining vasiyatiga amal qilmasligi kerak, unga itoat qilishi shart emas”.

Sodiq samarqandiy javobining umumiy qisqacha mazmuni shundan iborat. Undan tashqari javob orasida hizbiylik asoschisi Nabahoniyning otasi g`uluvga ketgan so`fiylarning kattasi bo`lganiga alohida urg`u berib, o`zining tasavvufni inkor etuvchi bemazhab “salafiy”lardan ekaniga ishorani ham qistirib o`tib ketadi.

Shu yerda yana diqqatingizni bir masalaga tortamiz. Sodiq samarqandiy videolavhasida hizbiylarni qoralarkan ularning “G`oya vasilani halol qiladi”, degan qoidalarining noto`g`ri ekaniga alohida to`xtaladi. Lekin xuddi shu Sodiq samarqandiyning o`zi hizbiylar bilan bo`lgan uchrashuvida shu qoidaga amal qilgan edi. Ya`ni, u hizbiylarga qarata: “Juda to`g`ri gaplarni aytdingizlar, birodarlar! Sizlar toshning bir tomonini ko`tarayotgan bo`lsangizlar, biz ham bir tomonini ko`tarmoqdamiz. Hammamizning dardu g`amimiz shu ummatni birlashtirish. Biz ayrim domlalarimiz qilgan xatoni qilmaymiz. Falonchi domla o`z masjididan janoza namozini ado qilgani kelgan bir hizbiyni haydab chiqaribdi. Buni qanday tushunish mumkin?!  Axir biz musulmon birodarlarimizni unisini undoq, bunisini esa bundoq deb tosh otaversak, bundan faqatgina kufr ahli va munofiqlar quvonadiku?!”, degan gapida o`zi bilibmi yo bilmaymi “G`oya vasilani halol qiladi”, degan qoida ichiga kirib qolgan edi. Buni qandoq tushunish mumkin?!

Avvalgi uchrashuvda bemazhab Sodiq samarqandiy bilan bahslashib, bir-birlarini to`g`ri tushungan va birodarlik kayfiyatida xayrlashgan hizbiy yigitlar bu videolavhadan keyin hayratga tushishadi. ABDULLOH tahallusli hizbiy Sodiq samarqandiyga yozgan nasihatnomasida shunday deydi:

“Shariat nomidan gapirayotgan olim odam bunchalar tezlikda boshqa to`n kiyib olganiga xayron qoldim. Hizb ut-Tahrir yigitlari bilan uchrashganda birodarlar deb ochiq yuz bilan gaplashib, ularning orqasidan esa, butunlay teskari yuz bilan gapirgan inson shariatning qaysi normasiga to`g`ri keladi?!”

Ha, hizbiyning bu savoli o`rinli bo`lgan. Darhaqiqat ikkiyuzlamachilik, har qanday munofiqona harakatlar islomda mutlaqo oqlanmaydi. Shundan keyin hizbiy yigit Sodiq samarqandiyni g`iybatchi, tuhmatchi va bo`htonchilikda ayblab uning hizbiylar haqida aytgan ba`zi da`volarini inkor qiladi. Va hadislardan raddiyalar beradi.

Asl negizi borib xavorijlikka taqaluvchi bu ikki toifaning bahs munozaralaridan shunday xolasaga kelish mumkin: Dunyoning ko`plab joylarida asosan yashirin faoliyat olib borayotgan hizb ut-tahrirchilar ham, o`zlarini sahobalar manhajida tasavvur qiluvchi bemazhab “salafiy”lar ham to`g`ri yo`lda emas!  “Shayx Sodiq samarqandiy” tahallusi ila tanilgan “salafiy” (vahhobiy) shaxsning ijodiy ishlarini tarqatuvchi Ixlos.org sayti va hizbiylar tomondan boshqariluvchi TURKISTON.NET, hizb-ut-tahrir.info va hokazo saytlar ham aslida ishonsa bo`ladigan to`g`ri maqsadlarga yo`naltirilgan emas!