Lotin alifbosida
Zavjangiz olima bo`lsa…
Imom Ahmad ibn Hanbal rahimahulloh Rasululloh sollallohu alayhi va sallamning suyukli zavjalari Oisha onamiz roziyallohu anhodan quyidagicha rivoyat qiladi:
Bir kuni Abu Rofe`ning xotini Salmo Rasululloh sollallohu alayhi va sallamning xuzuriga keldi. Salmoning eri Abu Rofe` uni urgani uchun, undan ketishga Rasulullohdan izn so`rab kelgandi.
Rasululloh sollallohu alayhi va sallam Abu Rofe`dan: “Ey Abu Rofe` oralaringda nima bo`ldiki, sen uni uribsan?”—deb so`radilar.
Abu rofe`: Ey Rasululloh bu ayol menga ozor beryapti—dedi.
Rasululloh sollallohu alayhi va sallam: “Ey Salmo nima sabab unga ozor beryapsan”, deb so`radilar.
Salmo: “men unga hech ozor bermadim. Ammo u namoz o`qib turgan holida yel chiqargandi, shunda unga: “Ey abu Rofe` Rasululloh sollallohu alayhi va sallam musulmonlarga yel chiqargach qayta tahorat olishni amr qilganlar”, dedim. U bo`lsa meni ura ketdi”, dedi.
Shunda Rasululloh sollallohu alayhi va sallam kuldilar va “hoy Abu Rofe` ayoling seni yomonlikka buyurmapti”, dedilar.
Qissadan hissa shuki, erkak kishi oilada boshliq bo`lsada, o`zidan ko`ra olimaroq ayolining ta`limiga quloq solmog`i kerak. Musulmon erkakka “seni aqling yetmaydi, nimani ham bilarding, men bilan ishing bo`lmasin”, deb ayollarni kamsitish yaramaydi. Ilmsiz er lozim bo`lsa, o`z ayolidan ham ilm olishi shart. Xalq orasida “Er xotinidan, ota farzandidan ilm olishi mumkinmas. Chunki ular ustoz bo`lib qoladi, ustozga esa qattiq gapirib bo`lmaydi”, degan gaplar yuradi. Yuqoridagi qissaga suyansak bu qoidani aylanib o`tib, kerak bo`lsa ayolimizdan ham ilm olishimiz lozimligi kelib chiqadi.
Hikmatulloh Ibrohim
Имом Аҳмад ибн Ҳанбал раҳимаҳуллоҳ Расулуллоҳ соллаллоҳу алайҳи ва салламнинг суюкли завжалари Оиша онамиз розияллоҳу анҳодан қуйидагича ривоят қилади:
Бир куни Абу Рофеънинг хотини Салмо Расулуллоҳ соллаллоҳу алайҳи ва салламнинг хузурига келди. Салмонинг эри Абу Рофеъ уни ургани учун, ундан кетишга Расулуллоҳдан изн сўраб келганди.
Расулуллоҳ соллаллоҳу алайҳи ва саллам Абу Рофеъдан: “Эй Абу Рофеъ ораларингда нима бўлдики, сен уни урибсан?”, деб сўрадилар.
Абу Рофеъ: «Эй Расулуллоҳ бу аёл менга озор беряпти», деди.
Расулуллоҳ соллаллоҳу алайҳи ва саллам: “Эй Салмо нима сабаб унга озор беряпсан”, деб сўрадилар.
Салмо: “Мен унга ҳеч озор бермадим. Аммо у намоз ўқиб турган ҳолида ел чиқарганди, шунда унга: “Эй Абу Рофеъ, Расулуллоҳ соллаллоҳу алайҳи ва саллам мусулмонларга ел чиқаргач қайта таҳорат олишни амр қилганлар”, дедим. У бўлса мени ура кетди”, деди.
Шунда Расулуллоҳ соллаллоҳу алайҳи ва саллам кулдилар ва “Ҳой Абу Рофеъ, аёлинг сени ёмонликка буюрмапти”, дедилар.
Қиссадан ҳисса шуки, эркак киши оилада бошлиқ бўлсада, ўзидан кўра олимароқ аёлининг таълимига қулоқ солмоғи керак. Мусулмон эркакка “сени ақлинг етмайди, нимани ҳам билардинг, мен билан ишинг бўлмасин”, деб аёлларни камситиш ярамайди. Илмсиз эр лозим бўлса, ўз аёлидан ҳам илм олиши шарт. Халқ орасида “Эр хотинидан, ота фарзандидан илм олиши мумкинмас. Чунки улар устоз бўлиб қолади, устозга эса қаттиқ гапириб бўлмайди”, деган гаплар юради. Юқоридаги қиссага суянсак бу қоидани айланиб ўтиб, керак бўлса аёлимиздан ҳам илм олишимиз лозимлиги келиб чиқади.
Ҳикматуллоҳ Иброҳим
Facebook
Google+
Одноклассники
E-mail
